Douscentos xadrecistas participarán en Poio no Internacional de Xadrez APECR
Por Redacción
Preto de 200 xadrecistas se darán cita este sábado 6 de xullo no Centro Cultural Xaime Illa para disputar o Internacional APECR 2024, un torneo organizado por Dan Cruz, Luís Fraga e Pablo García e co que colabora o Concello de Poio.
Ata Raxó, achegaranse xogadores de toda Galicia, con presencia de grandes clubs como Fontecarmoa ou Xadrez Mos, e incluso hai algún participante internacional.
É un torneo totalmente inclusivo, xa que disporá de material adaptado para xogadores con discapacidade visual que lle permitirá competir na mesma modalidade que o resto de participantes, e aberto para toda a cidadanía, independentemente da súa idade.
De feito, o benxamín do torneo acaba de cumprir 7 anos e lévase unha diferencia de 83 anos coa participante de máis idade inscrita.
Este torneo busca actualizar e recuperar o Open Concello de Poio que se facía a principios dos anos 2000, que era un torneo internacional de nove días moi importante do circuíto galego.
Ademais, pretende servir como homenaxe a Alberto Eyo Castro-Rial, con lazos importantes que o vencellan a Poio e a Raxó, que finou hai uns meses e que era un rapaz moi coñecido e querido na comunidade xadrecista galega. É por iso que o torneo leva as súas iniciais no nome.
O Internacional de Xadrez APECR 2024 é un torneo oficial da Federación Galega de Xadrez. Válido para ELO FIDE de ritmo rápido, constará de nove roldas 10'+5" en sistema suízo que se disputarán todas o sábado, catro pola mañá (desde as 11.00 horas) e cinco pola tarde (a partir das 16.15 horas).
Haberá unha clasificación única absoluta, na que se repartirán máis de 400 euros de premios en metálico, e premios e recoñecementos especiais para as categorías feminina, sub-8, sub-10, sub-12, sub-14, sub-16 e local.