Sidonie, La Casa Azul, Fillas de Cassandra ou Celtas Cortos amenizarán os 'Concertos do Marisco' no Grove
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
Doce concertos formarán parte da programación musical que O Grove deseñou para amenizar a 60 edición da súa Festa do Marisco, que se celebrará entre os días 5 e 14 de outubro.
Serán dez días de música, con acceso gratuíto aos concertos, todos eles protagonizados por diferentes artistas de primeiro nivel e cunha longa traxectoria sobre os escenarios. Serán na chaira do porto.
A eles sumarase unha ampla representación de bandas locais de O Grove, segundo explicaron este xoves o alcalde, José Cacabelos, e o director de I-Radia Crea, Carlos Montilla.
O xoves 5 de outubro inaugurará os concertos a banda local Freshkinños. O día seguinte, venres 6 de outubro, será o día dedicado aos máis mozos coa presenza do rapeiro e actor Leïtï.
O sábado 7 subirá ao escenario o grupo liderado por Guille Milkyway, La Casa Azul, coñecido por algúns dos seus hits como La revolución sexual.
A representación galega estará presente da man de Fillas de Cassandra o domingo 8, mentres que a quenda das bandas locais será o luns 9 e martes 10 con Os Firrás e a Banda do Sequío. O mércores 11, Los Vagos farán de teloeiros dos clásicos Celtas Cortos.
Ana Moura e as pandereteiras de O Grove chegarán o xoves 12 como preludio dunha fin de semana na que actuarán o músico galego Pablo Lesuit e Sidonie o venres 13. Lontreira e a banda indie La La Love You darán fin aos concertos o sábado 14.
DJ Payca, Djow13, DJ Permanente, Nanein DJ e Manu TF serán os encargados de continuar a festa tras os concertos da fin de semana.