A Orquestra de Cámara Lira cumpre dez anos e celébrao con música
Por Oskar Viéitez
Este sábado 25 de xaneiro o Pazo da Cultura acollerá ás 20:00 horas un concerto da Orquestra de Cámara de Lira coa que celebran o seu décimo aniversario. Nesta cita tan especial estarán acompañados por outros músicos da sección de corda da Filharmónica Cidade de Pontevedra e con bailarinas da Escola de Danza Deborah.
A agrupación xuvenil, composta por 18 integrantes de entre 12 e 18 anos, pretende con este concerto recoñecer o traballo dos seus fundadores.
A Orquestra está formada por alumnos dos cursos altos de grao medio dos conservatorios da provincia, que ao cumprir os 18 anos pasan a integrar a Filharmónica Cidade de Pontevedra xunto a profesores do conservatorio e músicos profesionais de banda ademais de alumnos dos cursos superiores de grao medio.
Esa continuidade permite desenvolver iniciativas pedagóxicas compartidas e experiencias musicais conxuntas que se verán reflectidas este sábado no concerto aniversario do Pazo dá Cultura.
César Trabazos, presidente da asociación Cultural Lira, recorda que a iniciativa desta escola-orquestra foi dun grupo de pais de alumnos do profesor Algirdas Pocius, violinista e director de orquestra, que dende entón segue á fronte da agrupación.
Dende a súa presentación no 2004, o patrocinio do Concello bríndalles a oportunidade a estes novos intérpretes de ofrecer un mínimo de catro concertos anuais.