Aberta a reserva previa de prazas para o concerto de Ars Longa na Igrexa de Santa Clara
Por Anxo Lourido
Ante a previsión de gran asistencia de público, a Deputación estableceu un sistema de reserva de prazas para o concerto previsto para este venres 28 de xullo ás 20.00 horas na igrexa do Convento de Santa Clara.
Será o segundo e último do ciclo 'Noites de Música Antiga', que organiza o Museo de Pontevedra. Nesta ocasión, ao escenario subirase a agrupación Ars Longa para ofrecer o recital que leva por título 'Tesouros de América'.
A entrada é libre pero deberá reservarse a praza enviando un correo electrónico a reservas.museo@depo.gal. Indicarase o nome completo e poderanse reservar como máximo dúas prazas por persoa. O prazo de reserva quedará pechado o venres 28 ás 14.00 horas
Teresa Paz e Aland López crearon Ars Longa en 1994 na Habana. Os integrantes desta agrupación dedícanse á recuperación e estudo do repertorio que transcorre entre a Idade Media e o Barroco, con especial dedicación á música durante o período colonial na América Hispana.
En Pontevedra ofrecerán un repertorio variado entre pezas vocais e tamén instrumentais con títulos como Zarabanda, Fantasía sobre el Canto del Caballero ou Cumbées, entre outras.