O documental 'Terra de Pastequeiros' preséntase no Pazo da Cultura
Por Redacción
O proxecto de investigación da xornalista Ana Lois sobre as tradicións para eliminar o 'mal de ollo' que foi encontrando na parroquia pontevedresa de Tomeza poderase ver este sábado no auditorio do Pazo da Cultura coa presenza de numerosos veciños da zona.
Baixo o título 'Terra de Pastequeiros', neste documental cóntase a historia de curadores tradicionais que utilizaban elementos da liturxia católica. O curador lía un libro sagrado en latín que finalizaba coas palabras "Pax Tecum". Co paso do tempo, a eses sandadores denominábaselles pastequeiros.
Durante o pasado ano realizáronse dúas presentacións do proxecto na parroquia e, segundo explicaba Ana Lois, resultou todo un "xogo" porque os asistentes participaban e comentaban experiencias en relación con estes casos tradicionais.
O proxecto forma parte dun documental máis amplo que se está a realizar en toda Galicia co título 'Palabras secretas' que segundo a directora Ana Lois lle está a permitir descubrir un mundo fascinante.
A presentación será este sábado 18 ás 19.00 horas no Pazo da Cultura con entrada libre.
Vídeo promocional de 'Terra de pastequeiros'