Dobre función de '32m2', traxicomedia sobre o confinamento, na Semana Santa pontevedresa
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
![](/web/cache/scene/uploads/fotos/foto/89b/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6058a77bc1-32m2-ensaio-final029.jpg)
© ButacaZero | Serxo Gonzalez
![](/web/cache/scene/uploads/fotos/foto/085/_S7QytKoutjK3UsovKMnMzytWsi62MjKxUipKLc6sStUxMjDQSU_/_7NK0kt0snNTEnJSVWyrgUA_/6058a7dcbf-32m2-ensaio-final103.jpg)
© ButacaZero | Serxo Gonzalez
O Teatro Principal de Pontevedra acollerá os vindeiros mércores 31 de marzo e o xoves 1 de abril, en Semana Santa, unha dobre función de 32m2, unha traxicomedia sobre o confinamento da plataforma creativa ButacaZero dirixida por Xavier Castiñeira e Esther F. Carrodeguas,.
Nuria Gullón e Xurxo Cortázar son protagonistas desta peza de teatro absurdo sobre o encerro da pasada primavera a raíz da pandemia da covid-19.
O proxecto de Esther F. Carrodeguas e de Xavier Castiñeira propón unha viaxe cara un pasado recente "á fin de provocar unha catarse colectiva ante un acontecemento que marcou, e marcará, a vida da sociedade".
A través de elementos cómicos e tráxicos, 32m2 pon o foco sobre a convivencia da sociedade coa precariedade e as desigualdades na súa vida cotiá a través da mirada de Mar e Xan, unha parella que se considera 'antisistema' e que habita con tranquilidade nun pequeno piso dunha superficie de 32 metros cadrados ata que, de súpeto, un día confinan a toda a poboación.
Cuestións como a soidade, o abandono, as complexidades das relacións interpersoais ou o estrés e os ritmos frenéticos impostos na 'vella normalidade' serán algúns dos temas que se visualizarán nesta peza.
O espectáculo, que conta cunha banda sonora orixinal creada polo músico e axitador folclórico Rodrigo Cuevas, nace coa vontade de ofrecer unha ollada singular, reflexiva e 'sandadora' ante o confinamento.
Esther Carrodeguas e Xavier Castiñeira consideran que "todo o mundo se poderá sentir identificado coa obra", pois "todos mercamos un chisco máis de papel hixiénico do habitual, todas aplaudimos puntuais ás 20 horas, e finalmente acabamos por descubrir a merda que tiñamos debaixo das propias alfombras".
Con esta peza, propoñen botar unha ollada a unha situación que marcou a vida de toda a sociedade e que a poboación poida recoñecerse en situacións absurdas que "permitan comezar a curar as feridas e render homenaxe a quen marchou ou quen deixou o mellor de si mesmos nesta distopía".
A actuación está prevista, nas dúas xornadas, para as 20.00 horas.