Un concerto da coral Bella Helenes inaugura os Venres Culturais 2020 en Lérez
Por Redacción
A asociación sociocultural Cedofeita inaugurará os seus Venres Culturais de 2020 cun concerto da coral polifónica Bella Helenes de Pontevedra. Será o próximo venres 31 de xaneiro, ás 20,30 horas, na Casa da Cultura de Lérez.
A coral polifónica Bella Helenes, recordan desde Cedofeita, vén desenvolvendo intensas actividades culturais en concertos populares por distintos puntos de Galicia e diversas zonas españolas, tanto en actos relixiosos como en distintos festivais de carácter benéfico e social.
Composta por máis de trinta voces, a dirección desta cualificada coral pontevedresa corre a cargo Magdalena Argibay, persoa de recoñecido prestixio no ámbito da música profesional.
Para a actuación na Casa de Cultura de Lérez ten programado a interpretación de varias composicións, entre elas, Coloradiña (F. A. Rey Ribero), Morriña (F. Vide), Vento mareiro (J. Verea) ou Quiéreme siempre (M . Tilve).
O acto será de acceso libre ata completar o aforamento.