A Casa das Campás estrea a curtametraxe 'Luz de contra', do alumnado de Comunicación Audiovisual
Por Redacción
Un equipo liderado por mulleres novas, 15 das 18 integrantes, traballaron durante os últimos meses na elaboración dunha curtametraxe que leva por título 'Luz de contra'. A súa estrea está prevista para o vindeiro xoves 2 de maio, ás 19.30 horas, na Casa das Campás.
Este traballo fílmico realizouse a través do taller 'Celanova, estudio de ficción', no que participou o alumnado de Comunicación Audiovisual do campus de Pontevedra.
'Luz de contra' toma como referencia o libro 'O sol do verán' do autor galego Carlos Casares e trata unha historia sobre a soidade, na que participan actrices e actores profesionais como Cris Iglesias, Xavier Estévez e Alicia Armenteros.
A directora e guionista desta curtametraxe é Ana Campos, que sinala que a rodaxe se achegou a un ritmo de traballo próximo ao formato profesional e que lle permitiu probar todo o aprendido durante os catro anos de carreira ao mesmo tempo que traballaba en equipo co resto de compañeiros de facultade como a operadora de cámara Clara Alonso, a produtora Sara Bugallo ou a iluminadora Ariadna Cordal.
Na estrea proxectarase tamén o "making off" e haberá unha actuación sorpresa. Tras a estrea, o equipo que forma parte deste proxecto ten intención de que a película teña percorrido por diversos festivais de curtametraxes.