O Ateneo faise Nadal no Museo a través dunha performance multicultural
Por Redacción
O Ateneo de Pontevedra organiza unha performance para celebrar estas festas de Nadal. Trátase dun acto multicultural en que as persoas que asistan poderán escoitar un recital de poesía, microrrelato e música, dentro dun ambiente, que segundo a organización estará destinado ao reencontro e ao fomento da amizade entre os intérpretes das distintas disciplinas artísticas.
O evento leva por título 'O Ateneo faise Nadal no Museo' e vai desenvolverse este venres 27 ás 19.30 horas no salón de actos do Sexto Edificio do Museo de Pontevedra.
Intervirán os escritores Tamara Andrés, Elisabeth Oliveira, Carmen Quinteiro, Pablo Rodríguez, Xaime Toxo, Xulia María e Carlos Fontes, ademais do pintor Antón Pulido e o pintor e escritor Antón Sobral.
A música correrá a cargo do cantautor Gustavo Almeida, a escritora e pianista Carolina Brea Ageitos, o pianista Darío Dodro, o gaiteiro Óscar Ibáñez, a cantautora Sheila Patricia e o cantautor Luis Quintana.
A entrada será libre.