Un ciclo de películas que beben doutras películas
Por Redacción
A revisión, homenaxe, parodia ou posta en cuestión de "textos previos", esto é, filmes que toman como punto de partida outros filmes, centran desde este venres un novo ciclo de cine na Casa das Campás.
Oito proxeccións e dous relatorios integran o programa de A conversa sen fin: cinema e relectura en Hollywood, o ciclo que, cada venres ás 19.15 horas de aquí a decembro proporá unha revisión deses filmes da industria norteamericana que beben doutras películas previas para a súa construción, agrupando as proxeccións por parellas para amosar de forma consecutiva as películas que serven como punto de partida e, á semana seguinte, a revisión que outros cineastas fixeron destas.
"Moita xente sorprenderíase de que moitas películas que viron son versións ou homenaxes doutros filmes que non teñen interiorizados", salienta o programador Suso Novás, coordinador deste ciclo inserido na programación cultural da Vicerreitoría do campus, que, a través de catro emparellamentos, busca "confrontar dúas películas en dúas sesións consecutivas para que a xente vexa as concomitancias e diferencias entre ambas".
De feito, este ciclo aberto a toda a cidadanía e centrado na industria norteamericana, centrarase en filmes que "non parecen relecturas” que non implican “un mimetismo directo" coa película coa que dialogan.
As películas que se proxectarán son:
- 14 de outubro: "Raíces profundas", de George Stevens.
- 21 de outubro: "O xinete pálido", de Clint Eastwood
- 28 de outubro: Relatorio "Relectura da modernidade no thriller dos anos setenta", a cargo do programador e crítico José Manuel López.
- 4 de novembro: "A fera da miña nena", de Howard Hawks
- 11 de novembro: "Que me pasa, doutor?, de Peter Bogdanovich.
- 18 de novembro: "O último refuxio", de Raoul Wash
- 25 de novembro: "Xuntos ata a morte", de Raoul Wash
- 1 de decembro: Relatorio sobre o discurso propio de Brian de Palma, por Suso Novás.
- 8 de decembro: "Só o ceo o sabe", de Douglas Sirk
- 15 de decembro: "Lonxe do ceo", de Todd Haynes