O Teatro Principal acolle a estrea da webserie "Prevenidos", producida por alumnos do campus
Por Redacción
O Teatro Principal de Pontevedra acollerá o próximo 5 de outubro, ás oito da tarde, a estrea dunha nova webserie realizada por alumnos da Facultade de Ciencias Sociais. Trátase de Prevenidos, unha produción de catro episodios -de dez minutos cada un- rodada o pasado mes de xuño en Celanova (Ourense).
Prevenidos é a historia, en ton de humor e parodia, dun equipo de rodaxe que trata de realizar unha curtametraxe, pero que debido a diversos motivos non son capaces de avanzar nos seus respectivos departamentos.
"En ton de comedia contamos todo o proceso de produción da curtametraxe e parodiamos diferentes perfís do cinema", explicou no seu día a súa directora, Lucía Estévez.
Na produción desta webserie participaron dezanove alumnos da Facultade de Ciencias Sociais e da Comunicación, acompañados de oito actores da Escola Superior de Arte Dramática de Galicia (ESAD) de Galicia.
Os protagonistas de Prevenidos son Antía Costas, Cristina Andrade, Juan Palenzuela, Sergio Alfonso, Rubén Porto, Jacobo Lomba, Fran Nogueira e Marielvy Martínez.