Retrouso de Cela viaxa a Francia para participar no Festival Air d'Irlande
Por Redacción
Os músicos da agrupación de gaitas Retrouso de Cela preparan as maletas para viaxar ao sur de Francia. Alí, este sábado 14 de maio actuarán como cabeza de cartel do Festival celta Air d'Irlande que se celebra cada ano na localidade de Saint Sulpice A Pointe, en Toulouse. Este grupo de Cela (Bueu) serán os únicos representantes españois neste evento no que compartirán escenario con outros oito grupos de música celta, irlandeses e de distintos puntos de Francia.
A organización do Festival púxose en contacto con Retrouso ao coñecer as súas gravacións por Internet e tras varios meses de conversacións concretaron a súa participación nesta cita de música celta.
Ata terras francesas trasladaranse 16 músicos, que viaxarán en dúas furgonetas de aluguer para participar na oitava edición deste Festival. Neste ano, a agrupación de Bueu xa realizou actuacións de nivel en lugares como Mallorca, A Coruña, Cambados ou Baiona.
Retrouso fundouse no ano 2002 e combina pezas tradicionais con outras de composición baixo a dirección do gaiteiro de Hío, Cristóbal Prieto.