Bueu estende a celebracións das letras galegas máis alá do 17 de maio
Por Redacción
As celebracións do Día das Letras Galegas arrincan en Bueu o vindeiro venres, 13 de maio, cun concerto de Tino Baz, quen presenta a partir das 21.30 horas o seu espectáculo "Cantos de preto e de lonxe" no Centro Social. Esta actividade insírese na programación do Ano Castelao da Deputación de Pontevedra e será a posta en marcha perfecta para os actos de celebración do día máis importante da lingua galega no municipio buenense.
Así o destacaron este luns na rolda de prensa Silvia Carballo, concelleira de Normalización Lingüística, Carlos Eirea, concelleiro de cultura, Xosé Leal, deputado de cultura, e Xosé Antón Portela e Xosé Moital, presidente e tesoureiro respectivamente da Asociación Cultural para o Debate Ricardo Gómez Buceta.
Ademais, desde este martes e ata o 21 de maio, o Centro Social acollerá unha exposición sobre Manuel María, autor homenaxeado nas Letras Galegas 2016.
O sábado 14 de maio os máis pequenos terán unha actuación a cargo de Serafín Marcos "Que Manuel María?", que se celebrará no Centro Social ás 18 horas.
Ese mesmo día ao remate, en torno ás 19.30 horas, a sala Domínguez Búa acollerá unha mesa redonda sobre o xornalismo en galego, que contará coa participación dos xornalistas Xurxo Salgado, director do medio dixital Galicia Confidencial, e Rocío Castro, xornalista do Sermos Galiza, ademais de Antón Lopo, xornalista e gañador da edición deste ano do premio de xornalismo Johán Carballeira. Neste sentido, Silvia Carballo aproveitou para destacar "a importancia de facer xornalismo en galego e de manter viva a nosa lingua a través dos medios de comunicación". Ademais, tamén apuntou que "estas actividades de conmemoración do Día das Letras Galegas veñen complementar as accións que se organizan durante todo o ano para a defensa da lingua galega".
O domingo será a quenda do V Festival Poético do Morrazo, organizado en colaboración coa Asociación Cultural ‘Ricardo Gómez Buceta’ e que terá lugar ás 19.30 horas no Centro Social do Mar. No acto, presentarase o poemario "Os fillos da fame" de Ismael Ramos, gañador do Johán Carballeira de Poesía do ano 2015, ademais de "A elegancia do século", de Pura Tejelo, gañadora da presente edición.
A continuación, estudantes do CEIP A Pedra e do IES Illa de Ons participarán nunha lectura da obra de Manuel María, e xa despois, pecharase o acto co recital poético a cargo dos poetas Antía Juncal, Miriam Ferradáns e Leo Campos.
E xa para culminar, o luns 16 de maio farase unha lectura pública na Casa do Concello baixo o lema "O idioma é vida", na que participarán os concelleiros municipais ademais das persoas que o desexen.
Carlos Eirea destacou a variedade de actos que se estenden máis alá do propio 17 de maio, e que se achegan a todos os públicos. Ao remate, o deputado provincial fixo entrega do libro "Os soños na gaiola" ao Concello de Bueu e ao presidente da Asociación Ricardo Gómez Buceta, xa que desde o ente provincial valoran moito o traballo dos colectivos sociais e culturais.
Estes eventos contan coa colaboración da Secretaría Xeral de Política Lingüística e da Deputación de Pontevedra.