Unha visión cotidiana da discapacidade no Palacete das Mendoza
Por Redacción
Contribuír á normalización e romper cos estereotipos que perseguen ás persoas con discapacidade. É o obxectivo da exposición que se inaugurou este venres no Palacete das Mendoza, sede de Turismo Rías Baixas.
Alí, ata o próximo 22 de abril poderase visitar a mostra As persoas con discapacidade na vida cotiá, organizada pola Fundación Grupo Norte e o Instituto Universitario para a Integración na Comunidade da Universidade de Salamanca.
A exposición componse de 65 fotografías que permiten coñecer e entender a realidade das persoas con discapacidade desde a perspectiva dos seus propios protagonistas, familiares, persoal de apoio e, por suposto, o fotógrafo que realiza a instantánea.
Busca ofrecer imaxes positivas que permitan a reflexión, empatía e identificación co mundo da discapacidade.
As instantáneas forman parte dunha selección específica realizada para a ocasión entre os mellores traballos presentados ao Concurso Internacional de Fotografía Dixital organizado desde o ano 2003 e que recibe anualmente máis dun milleiro de fotografías procedentes de todo o mundo.
A exposición propón un enfoque das realidades humanas promovendo a verdadeira integración das persoas con discapacidade desde os ámbitos da superación e normalidade. Nela reflíctese a accesibilidade, o deseño universal e a discriminación positiva en termos de integración laboral como ideas forza que foron gañando peso, desbancando paradigmas afortunadamente esquecidos.
O horario de visitas é de luns a venres de 9 a 20 horas, os sábados de 10 a 14 horas e de 16 a 19 horas, e os domingos e festivos de 10 a 14 horas.