Aberto o prazo para presentar traballos ao concurso literario Xaime Illa Couto
Por Redacción
O Consello municipal de Cultura de Poio aprobou as bases para a XXIV edición do concurso literario Xaime Illa Couto. O prazo de presentación atópase aberto. A data de finalización de recollida dos traballos, que poden ser na categoría de poemas ou de relatos curtos, finaliza o 18 de abril ás 12.00 horas.
O xurado reunirase para fallar os premios o 4 de maio. A entrega dos premios coincidirá co 17 de maio, durante o transcurso do acto do Día das Letras Galegas no Centro Cultural Xaime Illa de Raxó.
Os requisitos para poder participar nas categorías de menores de idade obrigan a estar empadroado en Poio ou matriculado nun centro educativo do municipio e ter menos de 18 anos.
Para os adultos non existe limitación xeográfica nin de idade.
Os premios para os menores non superan os 90 euros tanto para poesía como para relato curto. Para os adultos, os premios ascenden a 300 euros para cada modalidade. As bases atópanse na web do Concello de Poio.