O clásico nunca pasa de moda: o ballet 'O lago dos cisnes' conquista Pontevedra
Por Mónica Patxot
O auditorio de Afundación en Pontevedra foi testemuña este domingo de que o clásico nunca (ou case) pasa de moda e que apostar por 'O lago dos cisnes' e por unha compañía de ballet como a Russian Classical Ballet sempre é un acerto. A actuación do Nadal da entidade encheu o recinto cultural.
A actuación enmárcase na xira que Russian Classical Ballet está a levar a cabo por distintas cidades españolas, entre elas Vigo. Ademais do nutrido corpo de baile, o público gozou do virtuosismo dos principais bailaríns solistas da compañía, entre eles, Mariinsky Kirill Safin e Svetlana Smirnova.
'O lago dos cisnes' narra a historia de Odette, unha nova vítima do feitizo do terrible bruxo Von Rothbart, que a converte en cisne durante o día adoptando forma humana durante a noite. Só unha declaración de amor verdadeira poderaa liberar da maldición. Un conto de amor, traizón e triunfo do ben sobre o mal que continúa conquistando aos seus espectadores.
Creado en 1990, o Russian Classical Ballet ten como obxectivo recuperar a tradición e os valores do ballet clásico ruso, aplicar a mellor técnica, así como unha destreza pouco común e unha coidada expresividade dramática.