Juan Rivas e Juan Moreno, novo diálogo entre pintores na beira do río
Por Redacción & Mónica Patxot
Dous pintores de diferentes xeracións volven encontrarse no Pazo da Cultura. Juan Moreno Badía e Juan Rivas son os protagonistas dunha nova edición da mostra 'Na beira do río. Diálogos na pintura', que se inaugurou este xoves na sala de exposicións do Pazo da Cultura de Pontevedra. Estará aberta ata o próximo 15 de novembro.
A quinta edición deste encontro está dedicado a un dos xéneros pictóricos máis importantes: a paisaxe.
Os protagonistas son Juan Rivas (Pontevedra, 1974) e Juan Moreno Badía (A Coruña, 1945) que desenvolven a súa pintura fronte a paisaxe facendo dúas lecturas diferentes entre si, pero nas que se poden atopar puntos de contacto que van dende o encadre, a fragmentación da paisaxe, a creación dunha atmosfera moi determinada ou unha certa mirada dende o poético.
Ao mesmo tempo, ambos autores interpretan esa paisaxe dende ópticas diferentes, como o poden ser a pincelada ou a aplicación da luz, así como a elección do motivo que no caso de Juan Rivas non deixa de ter un punto de denuncia das contaminacións que sofre a nosa paisaxe.
A exposición, que está comisariada por Ramón Rozas, pode visitarse de martes a venres de 17 a 21 horas, os sábados de 11 a 14 horas e de 17 a 21 horas e os domingos só en horario de mañá. A entrada é libre.