Alba Sotelo e Adrián Mandado, ollando a Latinoamérica dende Bueu
Por Redacción
Da man de Alba Sotelo e Adrián Mandado o espectador percorrerá parte de dous países de Latinoamérica, Perú e El Salvador, dando unha ollada as súas xentes, as súas paisaxes e problemáticas. Farao todo aquel que visite a partir do vindeiro luns 24 de agosto a exposición fotográfica 'Olladas desde Bueu a Latinoamérica' na sala Domínguez Búa de Bueu.
A mostra, que se inaugurará ás 20.30 horas, ten como obxectivo achegar a Bueu, unha vila "que tanto entende de mares e sacrificios", as miradas das persoas da outro lado do océano "para que poidamos compartir con eles as súas ansias de vivir e de plantarlle cara ao medo".
Segundo explica Mandado, "non é difícil para un fotógrafo perderse polos seus paisaxes e persoas", pois enfundar a cámara en Latinoamérica é "como intentar retratar un pesadelo amable: as malas situacións nas que sobreviven contrastan coa súa filosofía de vida tranquila ao marxe das preocupacións do mundo moderno".
As imaxes expostas van dende a mirada dun neno salvadoreño nunha escola na que se parece adiviñar un porvir complicado ata as paisaxes virxes de Perú illadas do mundo contemporáneo pasando por unha mariscadora ‘curilera’ que fuma puros para espantar os mosquitos que a asedian na profundidade do manglar ou rapaciños que xogan divertidos baixo a mirada atenta do seu can.