A exposición sobre o afundimento do Santa Isabel recala en Portonovo
Por Redacción
A lonxa de Portonovo acollerá a partir deste martes 18 de agosto, e ata o 18 de setembro, unha exposición itinerante sobre o afundimento do trasatlántico "Santa Isabel", que tivo lugar en 1921 fronte á praia da Lanzada, onde que chegaron mesmo algún dos cadáveres das máis de 200 persoas falecidas naquela traxedia. Foi a 100 metros da illa de Sálvora onde se produciu esta traxedia.
Do contido da exposición, organizada pola Concellaría de Cultura, deu conta este luns nunha rolda de prensa, o seu realizador, Celestino Viéitez, na que estivo acompañado polo edil de Cultura, Roberto Carlos Agís e polo patrón maior de Portonovo, José Antonio Gómez.
Oitenta e oito cadros e 186 fotografías realizadas por Luis Kasado, maquetas, obxectos do buque, documentos, unha proxección continua e tres conferencias cuxas datas concretas están aínda por determinar integran a totalidade da exposición.
Trátase dunha colección de obxectos, documentos e imaxes que van narrando, a través duns paneis moi gráficos, os detalles dunha traxedia que marcou a historia da ría arousana.