Vestidos con pincel, cosidos con agulla
Por Mónica Patxot
O edificio Sarmiento acolle ata o próximo 2 de agosto a mostra Vestidos con pincel, cosidos con agulla. Traxes tradicionais galegos. Trátase dunha exposición que fai un percorrido pola historia e evolución do traxe tradicional e a súa representación na pintura.
O proxecto expositivo, comisariado por José Luis Rodríguez, presidente da Asociación Cultural Gaiteiros Os de Algures, combina a elaboración de traxes tradicionais e a reprodución de fondos do Museo de Pontevedra.
As pezas dos traxes foron confeccionadas a imitación das que se representan nunha selección de obras pertencentes e expostas no Museo, todo iso completado con paneis explicativos con información detallada.
Desta forma o público poderá apreciar, coñecer e afondar nas pezas do traxe tradicional, observándoos en vivo e asociándoos ao seu tempo e uso, grazas ao contexto pictórico ao que fan referencia.
Os traxes tradicionais, incluídos dentro do patrimonio cultural inmaterial, experimentaron numerosos cambios dende a súa orixe adaptándose aos gustos e necesidades de diferentes épocas, de maneira que non podemos dicir que haxa un único modelo de traxe que sexa definidor deste ao longo da historia. Todas estas evolucións estarán representadas nesta mostra.