O 'Kaos' de Berta Artes, ata o 30 de abril na sala de exposicións da delegación da Xunta
Por Redacción
A sala de exposición do edificio administrativo da Xunta de Galicia en Pontevedra acolleu este xoves a inauguración da mostra titulada Kaos da artista Berta Ares.
A artista presenta unha exposición conformada por varias pezas de parede, chan e teito. Trátase de obras que xorden con xeometrías azarosas, ás que se lle superpoñen outras formas deliberadas elaboradas con capas de malla e fío.
"Non é só un diálogo de materiais e técnicas, senón tamén de modos de concibir a obra de arte vinculada á sala expositiva", explica a propia artista. As sinerxías entre obra e espazo son a clave fundamental desta instalación creada ex profeso por Berta Ares.
"O título, Kaos, reflexa non só o sentido literal de confusión, senón tamén de personificación do baleiro e de mestura informe", engadiu a artista.
A exposición de Berta Ares permanecerá aberta na sala de exposicións da Delegación Territorial ata o próximo 30 de abril en horario de 9 a 14 horas da mañá de luns a sábado.