O artista cambadés Rafael Alba presenta a súa mostra 'Esculturas' na Delegación da Xunta
Por Redacción
A sala de exposicións do edificio administrativo da Xunta de Galicia en Pontevedra acollerá este xoves 5 de febreiro, ás 12.30 horas, a inauguración da mostra titulada 'Esculturas' do artista cambadés Rafael Alba.
O escultor de Castrelo formouse en cantería e viticultura e dende pequeno enfocou a súa actividade cara á arte do modelado ata asumir a cantería-escultura, un dos oficios máis tradicionais de Galicia.
As súas experiencias profesionais comezaron con colaboracións co escultor Manolo Paz para despois traballar co escultor Francisco Vilar, con quen perfeccionou a súa aprendizaxe en modelado e talle en pedra. En colaboración con Manolo Rial ampliou os seus coñecementos con materiais como chumbo, cemento e silicona.
A súa traxectoria artística completouse co seu traballo co canteiro Miguel Fandiño para embarcarse nun proxecto con varios escultores da bisbarra de Arousa e poñer en marcha unha peza para o colexio público de Castrelo titulada 'Pedra da Auga'.
Na actualidade, Rafael Alba conta co seu propio obradoiro de artesanía onde aplica os seus coñecementos con novas experiencias e o ámbito que o rodea.
A exposición permanecerá aberta ata o 26 de febreiro en horario de 9:00 a 14:00 horas de luns a sábado e os xoves e venres tamén se pode visitar de 18:00 a 20:30 horas.