O artista Fernando Lafuente presenta a mostra "Maldita Orde"
Por Redacción
A sala de exposición do edificio administrativo da Xunta de Galicia en Pontevedra acollerá este xoves 8 de xaneiro, ás 19.30 horas, a inauguración da mostra titulada "Maldita Orde" do artista Fernando Lafuente.
Lafuente formouse como arquitecto superior pola Universidade Politécnica de Madrid e é licenciado en Belas Artes pola facultade de Pontevedra. Tamén conta cun master en Arte Contemporáneo e Creación Artística. Entre os seus premios atópase o Novos Valores de 2011 do Museo de Pontevedra e a Bienal Eusebio Sempere así como o Francesc Gimeno, ambos en 2014.
Tal e como o propio artista asegura, a súa obra apóiase na base xeométrica, no traballo que enlaza rigor con sensibilidade, centrando o seu interese "na manipulación dos límites, buscando novas relacións entre a figura e o fondo, tratando de neutralizar as deferencias entre pintura e escultura a través de sistemas construtivos e pictóricos".
Fernando Lafuente pinta taboleiros que descompón primeiro para compoñer despois
A pintura articulada e o ensamblaxe de planos de cor permítenlle ordenar os seus descubrimentos como método experimental que acaba conformando un resultado.
Fernando Lafuente pinta taboleiros que descompón primeiro para compoñer despois, segundo unha concepción xeométrica do espazo. Este proceso permítelle enriquecer o debuxo e os límites da cor, ademais de permitir que o baleiro se comporte como unha peza máis. O artista define as súas pinturas como "o plano en si mesmo e o plano no contexto; o ensamblaxe de planos; a pintura sen soporte, antes e en si mesmo como obra. Formar parte da obra e ser estrutura ao mesmo tempo".
Para Lafuente, é importante a conxugación do traballo cromático e do esforzo estrutural, a inclusión do soporte como pintura, desentendéndose do límite da obra e chegar á desaparición do propio soporte. "Deste xeito a obra se esponxa".
A exposición de Fernando Lafuente permanecerá aberta na sala de exposicións da Delegación Territorial ata o próximo 29 de xaneiro en horario de 9 a 14 horas da mañá de luns a sábado.