Afundación trae a Pontevedra "Os tres porquiños", unha adaptación musical desta fábula clásica
Por Redacción
A Fundación Galicia Obra Social (Afundación) traerá a Pontevedra Os tres porquiños, unha adaptación da fábula clásica realizada pola compañía Educateatro Produccións en formato de teatro musical. A representación terá lugar o próximo 20 de decembro ás 18.00 horas no centro social que a entidade ten na rúa Augusto González Besada, 2.
A obra, dirixida especialmente a nenos con idades comprendidas entre os tres e os sete anos, pretende reflectir como serían os tres porquiños e o lobo feroz hoxe en día e onde poderían encontrar un lugar seguro no que construír as súas tres casas. O seu obxectivo é mostrar valores como o respecto e a protección á natureza, a solidariedade ou o esforzo aos máis pequenos.
En formato de obra de teatro musical, os seus personaxes protagonistas interactuar cos nenos durante todo o espectáculo e sérvense da axuda dunha banda sonora composta por cinco pezas orixinais con coreografías nas que poderá participar todo o público asistente.
A compañía Educateatro Produccións está formada por un grupo de profesionais das artes escénicas e musicais que conta co asesoramento de profesores e pedagogos. A música, a palabra e a diversión son os tres piares nos que sustentan o seu traballo, están especializados no teatro infantil e xuvenil, porque buscan fomentar a educación en valores e presentar, dun xeito lúdico, a aprendizaxe das materias do currículo escolar.
As entradas están dende hoxe á venda nas canles habituais de comercialización de espectáculos de Afundación, a web de Servinova e o despacho telefónico 902 504 500, dende as 8.00 ata as 22.00 horas. Teñen un prezo entre os 5 e os 6,80 euros.