Vermú con música en directo na praza de Méndez Núñez, proposta para os domingos de xuño
Por Redacción
O son da música en directo ao tempo que os clientes toman unha tapa de polbo acompañados dunha cervexa mentres os nenos xogan pola praza constitúe a paisaxe ideal para a iniciativa 'Vermú-sicos' que vai desenvolverse durante os domingos deste mes de xuño na praza de Méndez Núñez.
Este proxecto xorde para promover a música en distintas prazas da cidade, a través do colectivo Pontevedra Ferve. Os grupos ou cantautores que participan nesta iniciativa son de Pontevedra e terán que respectar o horario marcado e os decibelios permitidos.
Os locais Chirala, Troco e Gramola son os primeiros en entrar neste proxecto con actuacións a partir deste domingo 8 de xuño de Raúl Cabaleiro & Cia; Leonardo Rodriguez (15 de xuño); Jazzgo (22 de xuño) e Rodrigo Valeiro (29 de xuño). As sesións musicais comezan ás 13.00 e finalizan ás 15.00 horas.
En caso de chuvia, a actividade teríase que suspender ata poder establecer unha nova data.