'Son das Alvedosas' enchoupará Arcade de nova música galega o 13 de xullo
Por Anxo Lourido
O Peirao de Arcade acollerá o sábado 13 de xullo a primeira edición do festival musical 'Son das Alvedosas', que organiza o Concello de Soutomaior en colaboración coa asociación cultural e xuvenil Irmandiñas de Soutomaior.
Este martes era presentado o evento por Rosana Martínez Boullosa, concelleira de Xuventude, acompañada por Sabela Lorenzo e Lara Prado como representantes da asociación; ademais de Clara Seco, en representación dos artistas que participarán nesta cita musical.
O cartel estará integrado por Laura Panicanela, MJ Pérez e Maskarpone. A estas actuacións sumarase unha sesión DJ da man de Meu Carinho e The Game Disco.
Ademais, están previstas actividades e obradoiros para o público asistente nun programa cargado de sorpresas que se irán presentando en próximas datas.
Rosana Martínez Boullosa explicou que o goberno de Soutomaior "traballa da man con todos os sectores sociais municipais para facer do noso concello un lugar mellor e non que ninguén queda atrás", indicou facendo referencia á actividade cultural que se está desenvolvendo no municipio durante os últimos meses.
Indicou que 'Son das Alvedosas' é a resposta a unha "demanda histórica" da mocidade de Soutomaior.
Nesta mesma liña tamén se pronunciaba Sabela Lorenzo, presidenta da asociación Irmandiñas de Soutomaior, ao indicar que este festival nace coa idea de dar á mocidade local un "espazo artístico e cultural que aposta polos valores da igualdade, promoción da cultura e a lingua galegas e a participación cidadá",