Un curso para aprender a pedalear, unha das propostas lúdico-culturais do Centro Social A Pedreira para xuño
Por Anxo Lourido
O Centro Social A Pedreira, situado na Rúa Serra de Pontevedra, anuncia as actividades que poñerá en marcha ao longo do mes de xuño.
O sábado, 1 de xuño, presentarán o Late Night Show coa intervención de Foni Díaz.
O 7 de xuño, venres, ás 21.00 horas, dentro das sesións de 'Unha noite na Pedreira', o músico Xurxo Souto, que foi líder de Os Diplomáticos de Monte Alto, presentará o seu libro 'Somos un pobo de artistas'.
Ao día seguinte, ás 17.30 horas poñerase en marcha a Escola Ciclista, unha actividade que ensinará a pedalear a escolares, mellorando a técnica e aprendendo regras de circulación. Ademais, a actividade tamén servirá para obter coñecementos sobre mantemento básico da bicicleta con nocións sobre a reparación de picadas, axuste de freos e de marchas.
Nese mesmo sábado, ás 20.30 horas, o Centro Social A Pedreira acollerá a proxección da película 'Pride', dirixida por Matthew Warchus e ambientada na época do mandato de Margaret Thatcher.
Xa o venres 21 está programado un 'Coloquio sobre a análise de situación e mudanzas xeopolíticas', coa interención de Óscar Valadares da Asociación Internacionalista Mar de Lumes e Antón García, integrante da Aula Castelao de Filosofía.
O sábado 22, durante as últimas horas da tarde, vai levarse a cabo unha ruta ornitolóxica e tamén se programa un concerto de Okeoh.
O 23 de xuño, cunha gran fogueira nos terreos de Tafisa, celebrarase unha actividade denominada Lume Novo.
Por último, unha foliada e o concerto de As da Casa completan a oferta musical o venres 28, mentres que o sábado 29, Juan Carballo protagoniza un recital poético.