Chamar a atención nun mercado editorial repleto de novidades, con autores cuxo popular nome é un reclamo en si e onde alcumarse novela negra ou thriller é un valor de moda, supón todo un éxito. Cristina López Barrio conseguiuno. Primeiro porque con 'La tierra bajo tus pies' fíxose co Premio Azorín de Novela 2024 e segundo porque é evidente que nesta novela hai oficio. Charlamos con ela no podcast 'Cara a cara'.
Ambiéntase na España de 1935. Cati, a protagonista, é unha moza de familia acomodada que vive en Madrid. Un revés familiar lévaa a decidir que marcha á España rural como integrante das Misións Pedagóxicas. E alí descobre outra vida. Nesta novela o público lector descobre, ou se reencontra, con Francisco Giner de los Ríos, con Manuel Bartolomé Cossío ou con Alejandro Casona e con frases, históricas ou adaptadas, que sentencian feitos como estes: "Quedámonos sen mestres; eles, que fixeron posible o amencer democrático en España", ou "As Misións (Pedagóxicas) non fan máis que educar. E a España, a salvación ha de virlle pola educación".
'La tierra bajo tus pies' é historia recente, si. Tamén é a sociedade da capital e a sociedade rural; a sociedade culta e a analfabeta. Ambas coas súas luces e as súas sombras. É igualmente un amor que chega imprevisto, o peso das vinganzas familiares, e como nos sinala Cristina López é "o achegamento ao que non coñecemos, é achegarse ao outro para respectar e para coñecer". Son en definitiva, trescentas tres páxinas para gozar da lectura.
O podcast completo esta dispoñible na web dePontevedraViva Radio e tamén se pode escoitar desde a ligazón que se adxunta.