Belas Artes acolle un mercado artístico para abrir as celebracións de San Ero
Por Redacción
A delegación de alumnado da facultade de Belas Artes organiza diferentes actividades con motivo da conmemoración do patrón do centro universitario, San Ero. Nas xornadas do martes 3 de maio e o mércores 4, o patio interior do centro, situado na rúa Mestranza de Pontevedra, está acollendo un mercado no que o alumnado pon á venda as súas creacións.
Ilustracións e obra gráfica, camisetas, pendentes ou obxectos decorativos reúnense neste mercado artístico e artesán. "Sempre é un día especial, é un momento de xuntanza cos compañeiros case a final do curso", recoñece a representante da delegación de alumnado Natalia Brandariz para o Diario da Universidade de Vigo (DUVI).
Este pequeno mercado, no que tanto estudantes como artistas titulados no centro exhiben e poñen á venda as súas creacións, está aberto a todos os públicos entre as 11.00 e ás 18.00 horas.
Así mesmo, o mércores 4 de maio terá lugar a primeira fase dun concurso de debuxo, que se desenvolverá no espazo que antigamente ocupaba a cafetaría en horario de 11.30 a 12.30 e de 17.30 a 18.30 horas. Esta actividade completarase o xoves 5 coa final, na que a persoa gañadora terá como premio un agasallo doado por Enmarcaciones Torrado.
A celebración central terá lugar o xoves 5 de maio, o día do patrón San Ero, a partir das 12.00 horas, coas actuacións no patio interior da facultade de Noemia Veiga, Junn, Dalsi, More Amore, Riquinha dj, Baby Romero e Djow13.
Desde a delegación de alumnado informan de que este ano a temática escollida para a celebración é a década do 2000, polo que convidan a todas as persoas asistentes aos concertos do xoves acudir con vestimenta que siga a estética daqueles anos.