O equipo Ciudad de Pontevedra sente as cores da camiseta da Redeaxuda
Por Redacción
O Ciudad de Pontevedra é un equipo de Segunda Rexional que durante esta tempada buscou a colaboración de diferentes empresas para que patrocinasen as súas camisetas. Lograron que 22 firmas colaborasen con 50 euros cada unha para que o conxunto tivese a súa equipación deportiva. Pero faltaba unha camiseta por patrocinar, a do máximo goleador. O club decidiu custear esta elástica e que nela luza a plataforma social Redeaxuda.com.
Acompañados da concelleira de Benestar Social, Carmen Fouces, tres integrantes do club presentaban esta iniciativa que ten como obxectivo que a plataforma sexa coñecida nos terreos de xogo nos que xogará o Cidade de Pontevedra ao longo desta tempada. A cambio, o concello axudará economicamente ao conxunto feminino do club que milita en Segunda feminina galega e conta con 17 xogadoras.
Carmen Fouces sinalou que a Redeaxuda continúa obtendo un amplo respaldo ata o punto de que practicamente a totalidade das alertas que se realizaron durante este ano a través desta rede foron cubertas. Desta forma, a concelleira sinalou a importante acollida que obtivo a campaña de libros de texto e que os cidadáns continúan activos para mostrar a súa solidariedade con persoas que se encontran en situacións complicadas.