Os mandos da Policía Local ven "carentes de todo fundamento" as acusacións de discriminación de CC.OO.
Por Redacción
Os mandos da Policía Local de Pontevedra responderon este domingo ás acusacións realizadas polo sindicato Comisións Obreiras sobre un suposto trato discriminatorio da Xefatura deste Corpo cara a unha axente muller e sinalaron que as afirmacións sindicais son "carentes de todo fundamento, non se adaptan para nada a realidade, son radicalmente falsas".
A Xunta de Mandos da Policía Local, composta polos inspectores e inspectores principais do Corpo, fixo público un escrito no que fai constar a súa "total e absoluta discrepancia" coas manifestacións de CC.OO. Sinalan que "non é a nosa intención abrir ou manter ningún tipo de debate sobre o asunto", pero que queren "amosar a nosa postura e coñecemento estritamente profesional" diante das acusacións.
CC.OO., a través do seu voceiro, Antonio Millares, criticou duramente que unha policía que optou polo seu dereito a non facer o turno de noite ao cumprir os 55 anos foi arrebatada do seu posto na emisora da Xefatura e cre que se trata dunha situación de discriminación por cuestión de idade. Frente a estes cuestionamentos, os mandos policiais responde que "en ningún caso a decisión que se cuestiona pode ser tildada de arbitraria ou discriminatoria, nin por razón de sexo nin por razón de idade nin por ningunha outra razón".
Aseguran que a decisión "está perfectamente fundamentada e é axustada a dereito en todos os seus termos" e que, ademais, é a única posible desde o punto de vista organizativo, pois "todos os integrantes do cadro de persoal da policía son conscientes de que, no marco do actual sistema normativo e organizativo, calquera outra decisión distinta á adoptada prexudicaría a outros policías de xeito inmediato". Así mesmo, tería "graves consecuencias a medio e longo prazo", no momento en que outros policías esixisen igualdade de trato, "o que inevitablemente se traduciría nunha diminución na prestación dos servizos aos cidadáns e isto último é sinxelamente impropio e inasumible".
"Non é arbitraria ou discriminatoria, nin por razón de sexo nin por razón de idade nin por ningunha outra razón"
Ademais, aseguran que a decisión que se cuestiona non é nova no seno da policía, pois existen antecedentes non moi alonxados no tempo nos que un axente home se atopou na mesma situación e foi igualmente informado de que o exercicio lexítimo do seu dereito a non prestar servizo de noite era incompatible coa continuidade na unidade a que nese momento pertencía. "Non entendemos cal é a diferenza que agora se pretende establecer, pois precisamente o caso que nos ocupa recibiu un trato exactamente idéntico ao que se viña mantendo con anterioridade", engaden.
Os mandos policiais tamén mostran a súa "sorpresa" sobre as críticas de CC.OO. sobre o multamóbil, pois desde un punto de vista estritamente profesional "non entendemos como un sindicato de traballadores pode posicionarse en contra da mellora dos medios e recursos materiais postos a disposición dos policías para o exercicio da súa función".
Así, para eles resulta "incuestionable" que o multamóbil e outros medios técnicos de previsible adquisición "engaden un plus de obxectividade a unha parte moi importante do traballo diario dos policías, que é a denuncia das potenciais infraccións de tráfico". Ademais, "axuda a optimizar" a xestión dos recursos persoais e permite desenvolver novas actividades que incidan na mellora da seguridade pública.