Lores compite con Arguiñano, así foi o programa de televisión
Por Oskar Viéitez
Emitiuse o pasado xoves 19 de setembro, pero se o perdiches na Internet pódese ver o programa de Canal Cocina no que Miguel Anxo Fernández Lores, alcalde de Pontevedra, era o protagonista.
Hoy cocina el alcalde, é o novo formato da canle que mostra, de man dos distintos rexedores, as peculiaridades da nosa rica e variada gastronomía.
No programa que foi gravado recentemente na Praza da Peregrina de Pontevedra, o alcalde mostrou as súas habilidades confeccionando Polbo estilo Ons, un dos pratos máis típicos da gastronomía local.
Ademais, as cámaras de Canal Cocina percorreron algúns dos establecementos gastronómicos máis importantes da cidade, nos que os espectadores pudieron coñecer as peculiaridades dos produtos e as receitas tradicionais da zona.
En concreto o tour gastronómico comeza coa visita á panadaría A Santiña, no Burgo, para coñecer de primeira man como se confecciona o tradicional Pan de Vila, elaborado con produtos totalmente autóctonos. A continuación diríxense ata Bora para visitar a empresa Hifas da terra, especializada na produción e venda de cogomelos.
Por último, antes de ver o alcalde defenderse fronte aos fogóns, o tour continuou ata o restaurante Casa Román para degustar algunhas das especialidades típicas da zona, como arroces, mariscos e carnes puramente galegas.