Os alcaldes reclaman negociar co Ministerio de Facenda o reparto de fondos pola Covid-19
Por Oskar Viéitez
Un total de 29 Concellos de todo o Estado demandan a apertura dun proceso de diálogo co Ministerio de Facenda para establecer criterios de igualdade no reparto de fondos pola Covid-19.
Este martes, Pontevedra participou nunha nova xuntanza telemática xunto con 28 Concellos máis de todo o Estado, que se corresponden con 13 formacións políticas distintas, para abordar a nova proposta de Real Decreto formulada polo Ministerio de Facenda sobre o reparto de fondos a entidades locais para paliar os efectos da Covid-19.
Toda vez que, tal e como se esperaba, a anterior proposta de Real Decreto (coñecido como "real decreto de remanentes") non foi convalidado no debate parlamentario do pasado 10 de setembro, os Concellos volven reclamar ante o Ministerio de Facenda a apertura dun proceso de diálogo con carácter inmediato, co obxecto de iniciar novas negociacións que permitan establecer criterios de reparto dos fondos baseados na igualdade e na solidariedade, tal e como xa se fixo cos fondos destinados ás Comunidades Autónomas.
Tamén se solicita que no futuro decreto se garanta que as Entidades Locais poidan participar como beneficiarias dos fondos europeos.
Na xuntanza desta mañá, ademais de Pontevedra, participaron Algeciras, Alicante, Almería, Badajoz, Badalona, Cádiz, Córdoba, Girona, Granada, Lleida, Madrid, Málaga, Marbella, Murcia, Oviedo, Palencia, Pamplona, Pozuelo de Alarcón, Reus, Salamanca, Santander, Santa Cruz de Tenerife, Tarragona, Telde, Terrassa, Teruel, Valencia e Zaragoza.