O paraíso natural das Rías Baixas sorprende en FITUR
Por Redacción
Moito se falou das Rías Baixas na Feira Internacional de Turismo (FITUR) que se está celebrando en Madrid. Foi coa presentación da campaña Sigue o teu instinto, coa que a Deputación de Pontevedra promoverá durante 2020 os atractivos naturais da provincia.
O stand de Galicia en FITUR encheuse de xente para asistir ao evento en directo no que a Deputación presentou unha proposta que pretende atraer aos visitantes a Pontevedra a través de unha aposta baseada na natureza, na sensibilidade e na vangarda das Rías Baixas.
Carmela Silva, presidenta da Deputación, rodeouse das actrices Celia Freijeiro e Jazmín Abuín e do xornalista Xabier Fortes, como embaixadores da provincia, para intercambiar ideas sobre a paz que transmite o "paraíso natural" que forman as Rías Baixas.
A provincia de Pontevedra, destacou Silva, ten "todos os ingredientes" para que os visitantes poidan "deterse, mirar, reencontrarse con si mesmos e gozar doutra forma de facer turismo en harmonía coa natureza", como se recolle no audiovisual que acompaña a esta campaña.
Sigue o teu instinto fai fincapé, segundo a presidenta provincial, en que "somos parte da natureza" e que hai lugares, como a provincia de Pontevedra, "que nos permiten recordalo e reencontrarnos con ela".
Deste xeito, subliñou ante os asistentes que "vivimos nun paraíso" onde temos "incribles paisaxes" tanto de costa como de interior e animounos a visitar Pontevedra porque "non hai outro sitio para gozar dunha natureza marabillosa".
As actrices Celia Freijeiro e Jazmín Abuín, ao igual que o xornalista Xabier Fortes, destacaron a capacidade da provincia de Pontevedra para "desconectar, fuxir do estrés e conectar cun mesmo, coa esencia e a raíz" e louvaron a beleza natural das Rías Baixas, onde calquera pode "relaxarse, sentir e seguir o noso instinto".
A esencia da natureza das Rías Baixas espallouse por FITUR tamén a través dun agasallo único que forma parte dunha obra de arte efémera e colectiva. Neste caso foron "bombas de biodiversidade" con especies autóctonas e representativas da provincia de Pontevedra.
O agasallo, elaborado por unha empresa sustentable da provincia e cun packaging realizado polo centro Juan María, inclúe no seu interior herbas de San Xoán, perexil de mar e breixo.
Ademais trátase dun regalo en edición limitada, con 500 unidades que forman parte dunha obra de arte elaborada polas ilustradoras Doa Oa e Elara Elvira que prepararon un mural-puzle con 500 pezas, unha por cada unha das caixas-agasallo que se repartiron en FITUR.
Deste xeito, cada caixa conta cun código QR no exterior que, ao escanealo, remite a unha parte dese mural formando, así, parte dunha obra de arte efémera colectiva.
A presidenta da Deputación tamén deu a coñecer en directo, case no mesmo momento do fallo do xurado, que a campaña Fame de experiencias coa que a institución provincial promoveu a provincia durante o 2019, recibiu o premio ao mellor audiovisual de promoción de produto turístico de España FITUR 2020.
Relacionadas:
-
'É o teu momento', a campaña de experiencias únicas que Rías Baixas levará a Fitur
Por María José Pita |
-
Pontevedra reúne nunha guía todos os roteiros e espazos verdes da cidade
Por Manu Otero |
-
A campaña turística Fame de Experiencias, da Deputación, recibe un novo premio
Por Redacción |
-
Turismo Rías Baixas logra a medalla de prata nun certame turístico en New York
Por Redacción |
-
Galardón en Berlín para 'Fame de experiencias', que promove o turismo gastronómico en Pontevedra
Por Redacción |
-
A gastronomía e a arte rupestre, intereses dos asistentes a FITUR sobre Pontevedra
Por Redacción |
-
Máis de 30 empresas turísticas de Sanxenxo desembarcan en FITUR
Por Redacción |
-
Terras de Pontevedra venderase en Fitur como destino turístico familiar
Por Oskar Viéitez |
-
A Deputación presentará en Fitur a súa campaña turística "Sigue o teu instinto", centrada na natureza
Por Oskar Viéitez |