O PSOE revalida a súa hexemonía en Pontevedra ante un PP en alza e o descalabro de Ciudadanos
Por Alejandro Espiño & Diego Torrado
Creada e actualizada
Creada e actualizada
Non conseguiron volver gañar en Galicia pero si o fixeron en Pontevedra. O PSdeG-PSOE mantén a súa hexemonía na provincia e, do mesmo xeito que sucedeu en abril, volven ser o partido máis votado entre os pontevedreses nas eleccións xerais do 10 de novembro.
Os socialistas recibiron o respaldo de 164.910 pontevedreses, un 31,86% dos votos. É un resultado moi similar ao logrado hai apenas sete meses, cando obtiveron 185.785 votos (32,24%). Manterán, por tanto, os seus tres deputados por Pontevedra.
Guillermo Meijón, número 2 por Pontevedra, asegurou que os socialistas están "moi satisfeitos" por repetir como partido máis votado na provincia, unha tendencia que "se consolida" e que, segundo Tino Fernández, "xa non é unha casualidade nin froito dun día".
Tres representantes terán tamén no Congreso os populares, que melloran os seus resultados de abril, cita na que obtivo só dous deputados. O PP, nesta ocasión, obtivo 150.294 votos, un 29,04%, fronte os 144.290 e o 25,04% das últimas eleccións.
O presidente do PP de Pontevedra, Alfonso Rueda, subliñou o crecemento dos populares na "práctica totalidad" dos municipios da provincia e apuntou que os votos a Cidadáns e Vox "no han servido para nada salvo para beneficiar a Pedro Sánchez".
O sétimo deputado por Pontevedra seguirá sendo para Galicia en Común, a confluencia galega de Unidas Podemos, que a pesar de perder máis de dous puntos en apoio popular con respecto a abril, manterá o seu asento na Cámara grazas aos seus 80.342 votos (15,52%).
Yolanda Díaz lamentou que Galicia en Común non lograse un segundo escano por Pontevedra, algo que achacou á fragmentación da esquerda, pero avanzou "seguiremos loitando nas Cortes polas demandas de toda a provincia".
O BNG, pola súa banda, pasa a ser a cuarta forza na provincia. Iso si, a pesar do seu ascenso non logra obter representación por Pontevedra. Quedou a uns once mil votos de arrebatarlle un dos tres que conseguiu o PP. Seus foron 38.836 votos, un 7,50%.
Carme da Silva, a pesar de non obter asento por Pontevedra, sinalou que este domingo é un día de "moitísima emoción" porque o BNG "fixo historia" e Galicia recupera "voz propia" cun deputado pola Coruña. "É algo que nos enche de felicidade e de alegría", engadiu.
Preto dos nacionalistas queda Vox, que tamén reforza a súa presenza na provincia ao sumar 37.610 votos (7,27%) entre os pontevedreses, case tres puntos máis que en abril.
O gran derrotado destas eleccións, sen dúbida, é Ciudadanos. Non só perde o deputado logrado en abril, senón que caen ata a sexta praza. Polo camiño deixan case sete puntos e tan só seduciron ao 4,56% dos electores, unhas 23.620 persoas.
Beatriz Pino fixo autocrítica e recoñece que "no es el resultado que queríamos" e que "no fueron buenos" para Ciudadanos. "No hay excusas", dixo a candidata por Pontevedra, que agradeceu o apoio recibido nestas eleccións.
Máis lonxe quedan a coalición Máis País-Equo, que obtén 10.076 votos (1,95%) e Pacma, que queda con 4.454 votos (0,86%).
Cos resultados que deixa as eleccións do 10 N, os deputados por Pontevedra serán Olga Alonso, Guillermo Meijón e Ángeles Marra (PSOE), María Ramallo, Diego Gago e Javier Bas (PP) e Yolanda Díaz (Galicia en Común).
O SENADO, EMPATE ENTRE PSOE E PP
Na Cámara Alta, pola súa banda, rexistrouse un empate entre os socialistas e os populares. Ambos se repartirán a partes iguais os catro senadores por Pontevedra, despois que o PSOE perdese un dos tres que obtivo en abril.
Co 98,69% escrutado, o socialista Modesto Pose volveu a ser o candidato máis votado, tras conseguir o apoio de 160.829 pontevedreses (32,17%); seguida dunha das súas compañeiras, a pontevedresa Marica Adrio, votada por 156.588 persoas (31,32%).
Os senadores polo PP serán o vigués Javier Guerra, ex conselleiro de Industria, que obtivo 154.893 votos (30,99%); e a pontevedresa Pilar Rojo, que entra no Senado tras convencer a 150.598 cidadáns (30,13%).
Relacionadas:
-
Carme da Silva repetirá como cabeza de lista do BNG ao Congreso por Pontevedra
Por Natalia Puga |
-
Votar unha e outra vez para que (case) nada cambie
Por Alejandro Espiño |
-
As eleccións galegas de 2020, prioridade dun PP que asegura estar "reforzado"
Por Redacción |
-
Carmela Silva considera que o acordo de Goberno entre o PSOE e Unidas Podemos "era unha decisión obrigada"
Por Oskar Viéitez |
-
Lores pon 'deberes' a Sánchez: A-57, tren de cercanías ou nó de Bombeiros, entre as prioridades
Por Alejandro Espiño |
-
O PSOE provincial aposta porque nas autonómicas se vai repetir o mesmo resultado destas xerais
Por Redacción |
-
"Obxectivo cumprido" no BNG ao regresar ao Congreso cun escano
Por Oskar Viéitez |
-
Satisfacción no PP local polo resultado electoral: "cambiamos la tendencia"
Por Oskar Viéitez |
-
10N: Caída notable da participación dos pontevedreses nas eleccións xerais
Por Alejandro Espiño & Diego Torrado | Creada e actualizada
-
10N: Chaman á participación ante a "importancia" para Galicia desta cita coas urnas
Por Alejandro Espiño & Diego Torrado |
-
10N: Os colexios electorais de Pontevedra abren con normalidade e sen incidentes
Por Alejandro Espiño |