A Deputación abre un proceso participativo para elaborar a súa ordenanza de compostaxe
Por Redacción
Elaborar de maneira participada unha ordenanza provincial sobre compostaxe ao abeiro do Plan Revitaliza. É o obxectivo do trámite que vén de iniciar a Deputación de Pontevedra. Deseñou un proceso participativo aberto ás asociacións máis representativas, organizacións, colectivos e veciñanza interesada en debater e facer achegas a esta normativa.
Para iso, a Deputación abriu na súa páxina web unha consulta pública para que que se poidan realizar as suxestións correspondentes. Ademais, pediu achegas específicas ás comunidades de montes de Pontevedra, así como a diferentes colectivos ecoloxistas, entre eles Adega, Amigos da Terra, APDR, o Colectivo Ecoloxista do Salnés ou Vaipolorío.
A regulación da compostaxe a través desta ordenanza pretende "poñer luz" na lexislación actual, segundo o vicepresidente César Mosquera, xa que hai normativa que establece que as autoridades ambientais impulsarán a compostaxe individual e comunitaria, pero hai unha "carencia de textos suficientes" que concreten as condicións nas que se deben impulsar.
O baleiro normativo dura, asegura Mosquera, "moito máis do razoable" e nunca debeu interpretarse "como lamentabelmente se fixo", como a innecesariedade duns mínimos de coñecementos e controis para poder levar adiante a autocompostaxe, "o que deu lugar a experiencias non sempre afortunadas ou que, no mellor dos casos, funcionaron moi por debaixo das súas posibilidades".
Pola contra, afirma o nacionalista, o Plan Revitaliza está baseado nos "mellores coñecementos e técnicas dispoñibles" e nun estruturado sistema de "esixentes" controis aos que estarán dedicados unha boa parte do articulado da futura normativa.
Así, coa futura ordenanza preténdese superar disfuncións derivadas da actual normativa e elaborar normas para o seguimento, control e trazabilidade de datos e accións na compostaxe individual e comunitaria.
Tamén se busca garantir a ausencia de riscos potenciais sobre o contorno inmediato, a salubridade e benestar público e privado, superar a "dicotomía" de impulsar algo pero negar ou obviar o correspondente apoio económico necesario ou superar a "contradición" de impulsar as autocompostaxes como principio, ao tempo de entorpecer o seu desenvolvemento por cuestións de supostas ilegalidades ou alegalidades.
O vicepresidente apunta que o momento actual é "relevante" para a redacción da nova ordenanza de autocompostaxe porque en breve se publicará a directiva de biorresiduos e a súa transposición ás lexislacións ambientais dos países membros.
"Entroncar a actual actividade provincial en residuos do Plan Revitaliza coas novas directrices de actuación da UE e da súa transposición á lexislación española resulta inescusable", apuntou.
Así mesmo, o vicepresidente indica que a necesidade e oportunidade da aprobación está motivada pola necesidade de reducir os custos da xestión dos residuos en zonas rurais e periurbanas polas actuais recollidas centralizadas de lixo, pola necesaria racionalización dos custos de xestión en zonas urbanas a través da eliminación ou redución dos biorresiduos, por previr a xeración destes, eliminar a súa presenza nas recollidas doutras fraccións, e minguar tamén os residuos orgánicos na fracción resto, o que permitiría unha drástica redución da frecuencia de recollida do actual colector verde.
Relacionadas:
-
O proxecto de compostaxe da Deputación chega a África
Por Oskar Viéitez |
-
Os "concellos Revitaliza" recibirán unha nova inxección de dous millóns de euros
Por Redacción |
-
A Deputación inicia unha nova selección de mestres composteiros para os concellos
Por Oskar Viéitez |
-
Comeza o reparto de composteiros individuais do Plan Revitaliza en Vilaboa
Por Redacción |
-
A Universidade de Sao Paulo quere aplicar a compostaxe no seu campus como se fai en Pontevedra
Por Oskar Viéitez & Mónica Patxot |
-
A escola é un dos puntais do Plan Revitaliza de compostaxe
Por Redacción & Paula Sanmartín |
-
Tres millóns de euros para darlle un pulo á compostaxe no que queda de ano
Por Redacción |