O Tríatlon Cidade de Pontevedra dificultará o estacionamento preto de Pasarón este sábado
Por Redacción
Este mércores 23 de agosto comezarán a instalarse os valos na zona do percorrido do Tríatlon Cidade de Pontevedra. A partir do venres 25 levarán a cabo as primeiras restricións de tráfico.
Segundo informa a Policía Local de Pontevedra, a partir das 15.00 horas pecharase ao tráfico a avenida de Bos Aires, entre a ponte dos Tirantes e a ponte das Palabras, na urbanización de Monte Porreiro. O tramo permanecerá pechado ao tráfico ata que finalice a competición e recóllase toda esta zona, que será o sábado ao redor das 23.30 horas.
Durante o sábado 26, a partir das 14.30 horas pecharase ao tráfico todo o circuíto, que afecta a Xosé Malvar, entre o cruzamento da Seca e a ponte dos Tirantes, a avenida de Bos Aires; Rafael Areses; Alexandre Bóveda; avenida de Compostela en sentido de entrada á cidade; Celso Emilio Ferreiro e o campus universitario. A finalización das probas e a apertura ao tráfico destas rúas está prevista para as 20.40 horas.
APARCADOIROS
A partir das 07.00 horas do venres 25 de agosto se prohibe estacionar na avenida de Bos Aires, entre a ponte dos Tirantes e o das Palabras. A paritr das 22.00 horas dese mesmo día prohibirase estacionar no primeiro tramo de Xosé Malvar; Rafael Areses, avenida de Compostela e avenida de Bos Aires, entre as pontes de Santiago e o dos Tirantes.
Xa o sábado 26, a partir das 07.00 horas impedirase o estacionamento no campus universitario e en Alexandre Bóveda.
A Policía Local de pontevedra terán en marcha un servizo de información personalizada para atender as dúbidas dos cidadáns. As consultas pódense realizar mediante teléfono a través do 986.833.080 ou por correo electrónico: cetra@pontevedra.eu
COINCIDENCIA CO PARTIDO DO PONTEVEDRA C.F.
O Cidade de Pontevedra de Tríatlon coincide co partido en Pasarón entre o Pontevedra C.F. e o Rápido de Bouzas, que comezará ás 20.30 horas, media hora antes de que finalice o campionato.
Por este motivo, o estacionamento nas proximidades do estadio será limitado, especialmente na avenida Compostela, Alexandre Bóveda, no campus universitario e nos estacionamentos disuasorios do Recinto Feiral. Pola contra, na rúa Xoán Manuel Pintos poderase aparcar ao longo de toda a xornada.
A Policía Local habilitará a rúa Martín Códax con estacionamento en batería para dar opcións aos condutores que se acheguen a Pasarón. Pecharase ao tráfico un sentido de circulación, entre A Gandara e Domingo Fontán.
Desde a Policía Local recoméndase aos afeccionados o desprazamento a pé ata o estadio. Neste sentido, para o tránsito peonil suxírese o acceso pola ponte do Burgo cara á avenida da Coruña e Xoán Bautista Andrade. O acceso pola ponte de Santiago recoméndase que se faga polo lazo esquerdo en dirección a Pasarón.