O "Mexilón" máis rico, na festa de Combarro
Por Cristina Saiz
Decenas de persoas achegáronse nesta primeira xornada da Festa do Mexilón ata a praza da Chousa en Combarro para degustar este saboroso molusco recollido nas bateas da ría de Pontevedra.
Esta cita gastronómica cumpre xa 23 anos de existencia, organizada polo Ateneo Corredoira dentro da celebración da Semana Cultural de San Roque.
Os visitantes poden degustar baixo a carpa montada para este evento mexillóns preparados baixo diferentes receitas, desde os clásicos ao vapor aos acompañados por vinagreta ou en escabeche, preparados ao tigre ou en empanada.
A festa continuará durante este martes 15 a partir das 12.00 horas coa animación da Agrupación Os Berberechiños desde as 13.30 horas. Durante a tarde, os postos de degustación volverán abrirse ás 18.00 horas, antes da tradicional baixada da Virxe da Renda desde a capela ata a igrexa parroquial de San Roque, acompañada polo grupo de gaitas Vides Novas. Este acto de carácter relixioso comezará ás 20.00 horas.