Notan un "repunte" na rehabilitación de edificios no centro histórico
Por Alejandro Espiño
A solicitude para rehabilitar un edificio na rúa Real e a licenza de primeira ocupación para unha residencia da terceira idade no antigo edificio de Almacenes Rodiño son os últimos exemplos que demostran o repunte que os servizos urbanísticos do Concello están a detectar nas rehabilitacións de inmobles do centro histórico.
Así o destacou este martes a concelleira de Urbanismo, Anabel Gulías, que celebrou especialmente que moitos destes proxectos sexan para vivendas ou comercios que non son hostalería e que virán a diversificar a oferta deste ámbito da cidade.
A Oficina Técnica de Rehabilitación informou 36 expedientes e 12 autorizacións diante da Consellería de Cultura dende o pasado marzo. Trátase en todos os casos de licenzas para obras maiores. A elas hai que engadir as solicitudes de autorización para obras menores e obras de locais.
Con respecto á residencia que estará situada na rúa Don Gonzalo, a Xunta de Goberno do próximo luns concederá a licenza de primeira ocupación. O centro formará parte dun complexo residencial e asistencial para maiores.
"Estamos diante dun exemplo de boa práctica empresarial", indicou Anabel Gulías, quen lembrou que ofertará 39 prazas de aloxamento para maiores nun réxime semiautónomo e creará 20 postos de traballo.
TERRAZAS E MISIÓN COMERCIAL
Con respecto á ordenanza de terrazas, Anabel Gulías explicou que xa está redactado o borrador da nova normativa. Antes de entregalo ás partes interesadas para a súa revisión, os técnicos municipais terán que emitir un informe e o Concello tamén quere falalo coa Policía Local, para que teña "todos os avais posibles" de cara a súa presentación.
Tamén hai novidades coa misión comercial. O goberno municipal manterá este mércores un novo encontro con AEMPE, AJE e a Cámara de Comercio para facilitarlles nova información e as últimas propostas que chegaron ao Concello, tanto de convites para incluír na axenda como de empresas que pediron formar parte da comitiva.
A patronal tamén aportará as súas achegas para lograr que esta misión comercial sexa "o máis fructífera" posible para todos, segundo indicou a responsable de Promoción Económica.
Relacionadas:
-
O Concello detecta un rebrote nas rehabilitacións do centro histórico
Por Oskar Viéitez |
-
Haberá atención "preferente" a arquitectos e aparelladores para desatascar Urbanismo
Por Alejandro Espiño |
-
Luz verde á rehabilitación de 63 novas vivendas no casco histórico e Estribela
Por Redacción |
-
Os ARI do centro histórico e de Estribela amplían prazos
Por Redacción |
-
Aproban un decálogo de medidas para axilizar os trámites urbanísticos no Concello
Por Alejandro Espiño |
-
Os construtores celebran o incremento das rehabilitacións en Pontevedra
Por Redacción |