Os pontevedreses gastaremos 85 euros de media nas rebaixas
Por Oskar Viéitez
O vindeiro sábado, día 7 de xaneiro comeza tradicionalmente as rebaixas de inverno. Con todo cada vez son máis os establecementos que se adiantan a esta data que xa só parecen respectar os grandes almacéns.
Cadeas como Sfera, H&M, Mango, Women's Secret, Bimba e Lola ou Adolfo Domínguez xa colgaron o cartel de rebaixas nas súas tendas, con descontos de ata o 50% nos produtos seleccionados, que poderán chegar na segunda quincena de xaneiro ata un 80%.
Desde a Federación Provicial de Comercio aseguran que ata finais de decembro este sector recuperou preto do 20% das vendas que perdera nestes últimos anos coa crise. A media de gasto por persoa sitúase ao redor dos 85 euros na cidade de Pontevedra, cun lixeiro aumento respecto ao ano anterior das rebaixas de inverno de 2016.
Segundo esta patronal, "o comercio en xeral está satisfeito", aínda que puntualizan que este crecemento nas vendas foron "á conta de estar a ofertar e rebaixando durante case os 12 meses do ano". Apuntan ademais outros factores como a competencia cada día maior ou o comercio online.
A estimación de vendas que se estiman para estas rebaixas de inverno de 2017 alcanzan os 9,1 millóns de euros na comarca de Pontevedra; 6,1 na do Salnés e 1,8 na comarca de Caldas, levándose a palma a comarca de Vigo con 33,9 millóns en previsión.
O total de vendas previstas para o comercio e os grandes centros comerciais, desde o 7 de xaneiro de 2017 ata o 7 de abril de 2017, será de 66.443.136 euros, na provincia de Pontevedra cun número total de habitantes de 956.816 habitantes.
A nosa provincia teñen un censo de comercio de 12.150 establecementos, máis os centros comerciais e os hipermercados.