Ponte Caldelas reclamará da Xunta un convenio vinculante para as obras da PO-234
Por Redacción
A Xunta de Goberno local de Ponte Caldelas acordou solicitar da Consellería de Infraestruturas a sinatura dun convenio vinculante para a execución das obras na estrada autonómica PO-234. A decisión produciuse despois de estudar o protocolo achegado pola conselleira de Infraestruturas, Ethel Vázquez, durante a xuntanza que mantivo co alcalde, Andrés Díaz, o pasado mércores.
O protocolo, que tamén foi sometido á valoración dos técnicos municipais, é unha "breve declaración de intencións" da Consellería que conclúe cunha quinta cláusula na que se advirte expresamente que "carece do menor valor xurídico". O documento, "que nin sequera foi presentado por rexistro senón cunha simple fotocopia entregada en man, carece de informes xurídicos ou referencias legais sobre as competencias de cada administración", segundo informron dende o goberno local.
A Xunta de Goberno local, integrada polos grupos municipais do PSdeG-PSOE, AVP e BNG, estima que "trátase dun documento deficiente e inconcreto, redactado nunha linguaxe coloquial, que non compromete a nada". "Parece que a Xunta de Galicia apúntase tamén á técnica dos papeliños sen valor administrativo, porque o que nos entregaron vale o mesmo que as sinaturas que anda recollendo o alcalde de Cerdedo-Cotobade sen presencia do secretario municipal e sen inscripción rexistral", lamenta Díaz.
O acordo aprobado pola Xunta de Goberno Local reprocha a "vaguidade" da consellería para definir a fórmula para a obtención dos terreos por parte do Concello, pois o protocolo só di: "De ser o caso, habilitaranse os procedementos administrativos que procedan para concretar a colaboración entre a administración autonómica e o Concello de Ponte Caldelas, en función da natureza de cada actuación e da normativa aplicable neste caso".
A Xunta de Goberno bota tamén en falta informes xurídicos que motiven a sinatura deste protocolo e por todo elo propón á Consellería a sinatura dun convenio interadministrativo para a execución das obras da PO-234. Un documento, destaca, que daría cumprimento aos acordos plenarios alcanzados por Ponte Caldelas e Cotobade o pasado mes de maio.
Con independencia disto, o Concello xa volveu convocar aos veciños afectados para propoñerlles que asinen un papel, sen valor de documento público, expresando á Consellería a súa vontade favorable a ceder os terreos á Xunta de Galicia para a execución das obras.
Relacionadas:
-
Ponte Caldelas mantén a súa oferta á Xunta de pagar as expropiacións da PO-234
Por Redacción |
-
Andrés Díaz tacha de "falta de respecto institucional" a ausencia da conselleira na reunión sobre a PO-234
Por Redacción |
-
Andrés Díaz, sobre os orzamentos da Xunta: "nos dan xusto o que esperábamos, nada"
Por Redacción |
-
O PP di que alcalde de Ponte Caldelas está "obsesionado polas fotos e os titulares" e esíxenlle que se poña a traballar
Por Oskar Viéitez |
-
Os populares de Ponte Caldelas esixen ao alcalde que consiga os terreos para a PO-234
Por Redacción |
-
Andrés Díaz expresa o seu enfado e "decepción" a Ethel Vázquez pola reforma da PO-234
Por Oskar Viéitez |
-
O alcalde de Ponte Caldelas e a conselleira de Infraestruturas sentarán a falar da PO-234
Por Oskar Viéitez |