Educación adxudica as obras de rehabilitación do colexio de Chancelas
Por Redacción
A Consellería de Cultura, Educación e Ordenación vén de publicar a adxudicación á empresa Ogmios Proyecto S.L. das obras da rehabilitación integral do CEIP Plurilingüe de Chancelas, en Poio.
O importe de adxudicación ascende a 1.286.230 euros para as tres actuacións da mesma natureza, o colexio de Chancelas, e outros dous de Cangas e Vila de Cruces.
En concreto, a actuación de Poio centrarase nas carpinterías do edificio e na fachada, na iluminación e nos falsos teitos, dado que outras partes como a cuberta ou a caldeira xa foron obxecto de accións anteriores nos últimos anos.
Deste xeito, manteranse as cubertas, as fachadas e o chan existente, pero actuarase sobre as carpinterías, que se substituirán. Ademais, no interior das fachadas inxectarase illamento térmico. Por outro lado, cambiarase a iluminación actual coa fin de mellorar a calidade da luz e mudaranse parte dos falsos teitos que presentan deficiencias, tendo en conta que no ano 2012 xa foran renovados os da zona de infantil.
O obxectivo é compatibilizar a realización das obras coa actividade docente e salvaguardando as condicións de seguridade dos alumnos. O prazo de execución estimado será de 2 meses e medio.