Os bombeiros sufocan as lapas dun vehículo do servizo de augas na Avenida de Vigo
Por Redacción
Axentes da Policía Local e os bombeiros do Parque de Pontevedra tiveron que intervir ao redor das 20.00 horas na avenida de Vigo para apagar o incendio que se orixinou nun vehículo da empresa concesionaria do servizo de augas de Pontevedra, Viaqua, segundo informaron desde o Parque de Bombeiros.
Os veciños, sorprendidos pola gran fumareda que xurdía do camión, alertaron os bombeiros, que apagaron as lapas. Segundo os primeiros indicios, o incendio orixinouse no motor do vehículo debido a un curtocircuíto eléctrico.
A rápida intervención evitou que se rexistrasen outros danos humanos ou materiais. Foi necesario cortar o trafico na avenida de Vigo durante o tempo en que os bombeiros tiveron que realizar os traballos para sufocar o incendio.