Bueu renuncia ao composteiro de Petís ante as protestas dos veciños
Por Redacción
O goberno local de Bueu vai desistir da súa proposta de colocar un dos catro composteiros solicitados á Deputación na zona de Petís. A decisión obedece ás reticencias dun grupo de propietarios de dous edificios colindantes, ante o cal o executivo prefire non apostar por esta localización para a primeira fase do plan de compostaxe provincial no que participa.
Nunha xuntanza celebrada este martes ante algúns destes veciños, na que ademais do alcalde Félix Juncal, estivo o concelleiro de Servizos Fidel Castro e o concelleiro e deputado provincial Xosé Leal, comunicouse a decisión xa que dende o goberno entenden que a base principal desta iniciativa está na participación da veciñanza para que visualice os aspectos positivos da mesma.
Neste aspecto Juncal indicou que, pese a non compartir as dúbidas formuladas polos opositores, si entende que a instalación dos elementos debe contar coa participación activa e o respaldo das vivendas máis próximas.
Ao tratarse dun proxecto piloto, o alcalde animou aos veciños a achegarse ás outras tres zonas previstas para os composteiros (dúas nas Lagoas e outra no entorno do pavillón Pablo Herbello) unha vez que estean acondicionadas para comprobar o bo funcionamento dos mesmos e a ausencia das supostas molestias que veñen esgrimindo nas últimas datas.
Dende o goberno sinalan que non se vai buscar unha nova ubicación para este composteiro nesta primeira fase xa que tería que estar próximo á zona descartada, onde se conseguiran os apoios precisos mediante sinaturas. No futuro, e tendo en conta a evolución positiva que esperan destes tres primeiros, o Concello apostará por estender estas instalacións a outras zonas da vila.
Relacionadas:
-
Bueu, a piques de inaugurar o seu segundo composteiro comunitario e de recibir 50 individuais
Por Redacción |
-
Un total de 20 concellos sumáronse ao Plan Compostaxe "Revitaliza" da Deputación
Por Oskar Viéitez |
-
98 veciños de Portonovo, 3 asociacións e 3 negocios adhírense á compostaxe comunitaria
Por Redacción |
-
O Concello solicitará composteiros comunitarios para Campañó e Monte Porreiro
Por Redacción |