A voltas co saneamento do Gafos: a Xunta reprocha ao Concello que non entregou os terreos necesarios
Por Redacción
A decisión de Augas de Galicia de deixar sen efecto o convenio asinado para executar o proxecto de saneamento do río Gafos segue a xerar polémica en Pontevedra. O organismo público respondeu este martes ás críticas da concelleira de Urbanismo, Carme da Silva, sobre a xestión que a Xunta realizou do proxecto e asegurou que o Concello "non foi quen de poñer a disposición os terreos necesarios para executar as obras proxectadas por eles mesmos".
Segundo indicou nun comunicado, Augas de Galicia reiterou a petición desa documentación en varias ocasións, sen resposta por parte do Concello. Ademais, critica que o Concello de Pontevedra non aportou a documentación necesaria para a licitación das obras, polo que o problema que imposibilitou a súa execución e derivou na necesidade de resolver o convenio non foi debido a deficiencias no proxecto.
Augas de Galicia lembra que executar o colector do río Gafos é unha responsabilidade do Concello de Pontevedra no marco das súas competencias en materia de saneamento e depuración e este organismo asumiu o compromiso de execución desta obra no marco dun acordo de colaboración co Concello.
A Xunta lembra que o proxecto de saneamento do río Gafos foi supervisado e aprobado por Augas de Galicia, de tal modo que conta co visto bo deste organismo. Polo tanto, Augas de Galicia ten cumprido os termos do convenio asinado con Pontevedra, manifestando deste modo a súa vontade de executar esta obra.
Afondando na polémica, o organismo autonómico quere aclarar que os fondos cos que se executan estas obras obrigan a que estean totalmente rematadas a finais de 2015, de modo que Augas de Galicia, para poder levar a cabo unha xestión responsable dos fondos que ten asignados, "veuse na obriga de resolver o convenio". En todo caso, asegura que segue aberta a futuras colaboracións co Concello de Pontevedra, sempre que se cumpran os compromisos que se adquiran.
Relacionadas:
-
O goberno local pretende que as obras para sanear o río Gafos comecen antes de 2017
Por Redacción |
-
O Concello inicia os trámites para licitar o saneamento dos Gafos sen a Xunta
Por Redacción |
-
Lores cuestiona a lealdade da Xunta: "Moito me temo que a reunión co presidente non serviu para nada"
Por Natalia Puga |
-
O Concello seguirá adiante co proxecto para sanear o Gafos que paralizou a Xunta
Por Natalia Puga |
-
O Gafos, sen saneamento: a Xunta dá marcha atrás ante o "reiterado incumprimento" do Concello
Por Redacción |