O traslado de colectivos sociais ao centro cívico de Campolongo, pendente dun trámite da ONCE
Por Alejandro Espiño
Amencer, Juan XXIII, Amizade e Xuntos deberán esperan aínda uns meses máis antes de ocupar o centro cívico de Campolongo, que estará situado na antiga residencia da ONCE. Aínda que se esperaba que, a estas alturas, xa tivesen dispoñibles os seus novos espazos no devandito inmoble, un trámite que depende da ONCE atrasou os plans que manexaba inicialmente o goberno municipal.
Ao estar situado o edificio dentro dunha propiedade privada, a ONCE debe tramitar unha serie de expedientes relacionados cun vial que o organismo debe ceder para que se poida tramitar as correspondentes licenzas de obras. "Pensamos que non se ía demorar tanto, pero non depende de nós", recoñece a concelleira de Benestar Social, Carmen Fouces, que espera, en todo caso, que este asunto se poida resolver antes de que finalice este mandato.
"Agardemos que a ONCE tramite os papeis canto antes, porque con este atraso non lle está facendo ben a asociación irmás como ás que van ocupar o edificio", afirma a concelleira nacionalista.
Cando se poida asinar o acordo de cesión, cada unha destas asociacións ocupará unha das catro plantas do inmoble e a súa rehabilitación e adecuación interior correrá a cargo dos seus futuros inquilinos, en función das necesidades do proxecto que queiran desenvolver nel.
Nun principio, Amencer destinará a súa planta á creación de vivendas protexidas e tuteladas, Xuntos trasladará todas as súas sedes a este edificio Juan XXIII prevé habilitar unha vivenda para discapacitados con certa autonomía e trasladar ao edificio a sede da fundación para o emprego de persoas con discapacidade e Amizade trasladará o seu servizo de intermediación laboral e creará aulas de formación.
Este atraso, segundo indica Carmen Fouces, non tería por que afectar aos outros colectivos e asociacións que tamén utilizarán o edificio, xa que as súas necesidades son diferentes e non estarán obrigados a tanta tramitación. Trátase, entre outros, das tres asociacións de veciños do barrio de Campolongo, a Coral Polifónica, a Sociedade Galega de Antropoloxía ou o Fondo Galego de Cooperación.
Relacionadas:
-
O local Centro Sur en Campolongo xa acolle as actividades das asociacións do sur da cidade
Por Mónica Patxot & Anxo Lourido |
-
O pavillón da ONCE xa pode usarse; a antiga residencia terá que esperar un pouco máis
Por Alejandro Espiño & Mónica Patxot |
-
Pontevedra renova a súa colaboración anual co Fondo Galego de Cooperación
Por Redacción |
-
Dan un prazo de tres meses á ONCE para que retome o convenio co Concello
Por Alejandro Espiño |
-
Catro asociacións do ámbito da discapacidade 'capitanearán' o centro cívico de Pontevedra Sur
Por Alejandro Espiño |
-
O alcalde lamenta que a Xunta e o Estado "teñan edificios sen uso" en Pontevedra
Por Oskar Viéitez |
-
As obras do centro cívico da zona sur concluirán no verán
Por Oskar Viéitez & Mónica Patxot |