Científicos pontevedreses descifran os segredos do herbario máis antigo do mundo
Por Redacción
Un equipo de investigadores do Consello Superior de Investigacións Científicas (CSIC), coa participación da Misión Biolóxica de Galicia, con sede na parroquia pontevedresa de Salcedo, estudará o herbario de variedades de vide de Simón de Rojas Clemente y Rubio, conservado dende hai máis de 200 anos no Real Jardín Botánico de Madrid.
José Estévez, un dos principais grupos adegueiros de Andalucía e de maior tradición en España, colabora co proxecto.
O traballo está dirixido pola investigadora do CSIC María del Carmen Martínez, responsable do grupo de Viticultura na Misión Biolóxica de Galicia, que identificará mediante técnicas ampelográficas e de ADN as variedades de vide do herbario, que se conserva dende 1802, para coñecer con exactitude cales se cultivan na actualidade e as que xa desapareceron. Xunto a este equipo participan o investigador Mauricio Velayos, do Real Jardín Botánico de Madrid, e o grupo de investigación do INRA-Montpellier (Francia), dirixido por Jean-Michel Boursiquot.
"Os datos reunidos ata o momento indican que se trata do herbario de variedades de vide cultivadas máis antigo do mundo", segundo sinala Martínez. O seguinte en antigüidade, engade, sería o que se conserva en Francia, que data de 1870.
O herbario consta de 186 pregos, e cada un inclúe as follas e brotes desecados dunha variedade concreta. Todas as mostras foron recollidas en Andalucía, gran parte en Sanlúcar de Barrameda, Trebujena e Xerez. Dende entón consérvanse no centro de investigación madrileño, xunto con máis de 1.000.000 de exemplares diferentes, que forman o maior herbario español de plantas vasculares.
Simón de Rojas Clemente foi o primeiro en aplicar o método científico ao estudo e descrición das variedades de vide cultivadas, e está considerado polo tanto o primeiro ampelógrafo do mundo. En 1807 publicou un libro, traducido a varios idiomas e imitado posteriormente por expertos de todo o mundo, no que establecía un método de descrición. "De feito, practicamente todos os parámetros que el estableceu se seguen utilizando na actualidade, xa que se recollen no código oficial para a descrición de variedades de vide, da Organización Internacional de Vide e o Viño, da que forman parte 46 países", indica Martínez.
Clemente inclúe no seu libro a descrición de gran parte das variedades conservadas no herbario, pero o seu costume de darlles nomes dedicados a autores, ou mesmo de inventalos, non permite saber con exactitude a cales podería referirse, argumenta Martínez. "Polo tanto, o feito de poder completar as descricións do libro con novos estudos ampelográficos e moleculares, directamente sobre o material do herbario, permitirá saber cales corresponden a variedades actuais, ou cales poderían ter desaparecido", explica a investigadora.
A empresa xerezana José Estévez sinala que a súa colaboración co CSIC serve para iniciar unha etapa de cooperación entras as dúas institucións, co obxectivo común de situarse á vangarda da ciencia e o viño e poñer de relevo a riqueza do patrimonio vitivinícola español. Mellorar a produtividade e a sostibilidade do sector vitivinícola andaluz son, ademais, obxectivos prioritarios para o grupo.
José Estévez, formado polas adegas La Guita, Marqués de Real Tesoro e Valdespino, é interprovedor de MERCADONA de viños de Xerez, brandies, licores e espirituosos, ademais de exportar a máis de 30 países dos cinco continentes, como Estados Unidos, Canadá, Rusia, Xapón, China, México, Reino Unido e Países Baixos, entre outros.
Relacionadas:
-
A científica pontevedresa Carmen Martínez, na selección española da ciencia
Por Redacción |
-
O Liceo Casino, sede dun simposio internacional sobre proteínas vexetais
Por Redacción |
-
Talento pontevedrés para facer fronte á praga dos taladros
Por Oskar Viéitez |
-
A Misión Biolóxica descobre os segredos do Mencía
Por Redacción |
-
Un congreso a celebrar en Pontevedra amosará como os grelos e as nabizas axudan a previr o cancro
Por Alejandro Espiño |
-
Máis de 100 investigadores de 24 países participarán no Symposium on Protein Cropws
Por Redacción |
-
O Goberno aposta por dous proxectos pontevedreses para mellorar o cultivo do millo
Por Redacción |
-
Viña Moraima principia coa Misión Biológica a vinificación experimental da variedade "ratiño"
Por Redacción |