Os hoteis de Pontevedra superaron o 85% de ocupación durante a primeira quincena de agosto
Por Anxo Lourido
Agosto está a resultar un bo mes para o sector hostaleiro da cidade con cifras de ocupación que roldaron entre o 85% e o 90% durante as dúas primeiras semanas deste mes. O presidente da Asociación de Hoteis de Pontevedra, José María de Cabo Landín, ten ademais boas sensacións en relación coa segunda quincena ante o bo comportamento das reservas ata o punto de que durante o último fin de semana non había nin unha soa praza nos hoteis da cidade. Prodúcese un efecto dominó, afirma José María de Cabo, "se na costa se encontran ao 100%, iso repercute na capital", indica o representante dos hoteleiros para explicar o cheo que se rexistrou en todas as Rías Baixas durante os días 16 e 17.
Se o mes de agosto agárdase que supere as cifras de ocupación de 2013, o mes de xullo resultou malo principalmente porque o tempo meteorolóxico non axudou. Hai que ter en conta que o prezo medio dos cuartos subiu entre un 5 e un 7%, un dato relevante para o sector xa que, durante os últimos anos, os prezos descenderan e agora se van recuperando pouco a pouco.
De Cabo apunta que se está a comprobar unha nova tendencia entre os clientes, a de reservar con certa planificación aproveitando ofertas. E é que o turismo español, ata hai uns anos, realizaba reservas dun mes a outro ou cunha anticipación de 15 días mentres que o alemán, inglés ou francés xa reserva cuartos cun ano de anticipación. "Ya tengo reservas para 2015" indica o tamén director do Hotel Rías Bajas en referencia a familias alemás, pero asegura que os españois comezan a reservar con máis antelación que antes para aproveitar as mellores tarifas. Este verán detéctase un repunte do turismo portugués que se está a recuperar tras os anos de grave crise económica, unha noticia fundamental para o sector hostaleiro galego.
O perfil dos clientes durante estas datas continúa sendo o de turistas de 40 a 50 anos que viaxan acompañados pola familia, normalmente menores de idade.
O presidente da Asociación de Hoteis espera que setembro tamén ofreza un bo balance cun nivel de ocupación que se sitúe sobre o 48%. Asegura que xa se están a realizar reservas para os días da celebración da Feira Franca, sobre todo, de turistas procedentes doutros puntos de Galicia e que levan repetindo durante os últimos anos. De Cabo considera que é moi importante este evento "porque move moito diñeiro". E neste sentido pide as administracións de Pontevedra que manteñan o esforzo, sobre todo, na aposta por competicións deportivas "porque deu grandes resultados". Segundo o empresario, o 20% da ocupación durante o primeiro semestre do ano veu derivada destas actividades deportivas.
Relacionadas:
-
Un 57% máis de turistas estranxeiros en Pontevedra
Por Redacción |
-
Pontevedra, á caza de cruceiristas
Por Redacción |
-
As oficinas de información turística da cidade recibiron en agosto 21.727 visitantes
Por Redacción |
-
O bo tempo regresará a fin de semana ás Rías Baixas
Por Redacción |
-
Os madrileños, principais visitantes turísticos de Poio durante a primeira quincena de agosto
Por Redacción |
-
Preto de 21.000 persoas farán turismo interior para coñecer a provincia a través da Deputación
Por Redacción |