Jacobo e Lorenzo deixan o Pontevedra para irse ao Compostela
Por Ramiro Espiño
Os intensos rumores que viñan circulando dende hai varias semanas sobre a posible marcha dos xogadores do Pontevedra, Jacobo e Lorenzo, ao Compostela confirmáronse na mañá do venres e ambos os dous chegaron a un acordo para rescindir os contratos que os vinculaban ao club granate para emprender rumbo a Santiago.
O primeiro en facelo foi o centrocampista Jacobo, que fixo efectiva unha cláusula do seu contrato que lle permitía marchar a un club de categoría superior, como é neste caso o Compostela, mediante a cal e co aboamento dunha pequena cantidade pactada no momento da súa renovación, fai escasas semanas, obtivo a baixa do club granate. Iso si, Jacobo quixo ter un xesto de agradecemento cara ao Pontevedra e antes de abandonar as oficinas de Pasarón quixo darse de alta como socio, dando de alta igualmente a súa noiva, segundo informaron fontes do club.
Jacobo fora obxectivo do adestrador compostelán, Fredi, quen xa o tivera ás súas ordes no Alondras, dende o momento en que se fixo cargo do club branquiazul. A súa baixa obriga o Pontevedra a intensificar a busca de reforzos para o mediocampo, pois agora serán dous os postos a cubrir nesa posición, en lugar do mediocentro que buscan Milo Abelleira e Nando.
Polo que respecta ao porteiro Lorenzo, se ben hai acordo verbal entre xogador e Pontevedra, falta oficializalo por escrito, o que presumiblemente se efectuará sen problemas nas próximas horas. A pesar diso, o Compostela adiantouse, facendo oficial a súa fichaxe sen esperar a que a rescisión do correspondente contrato estivese materializada.
O devandito acordo quedou pechado por escrito a primeiras horas da tarde, polo que Lorenzo obtivo a baixa confirmando a súa fichaxe polo Compostela.
Neste caso, para a portaría non está previsto que o Pontevedra busque substituto, ao contar para o posto co recien fichado Paco, e con Edu Sousa.
NOVO ADESTRADOR DE PORTEIROS
Tras a marcha de Pablo Valente e a rescisión de contrato de Iago Farto, o Pontevedra incorporou ao corpo técnico do primeiro equipo a Jaime García Formoso como adestrador de porteiros. A tempada pasada Jaime estivo a cargo do adestramento dos porteiros da base e axudante de Pablo Valente, despois de traballar anteriormente cos porteiros do Salgueiriños C.F.