O Arxil gaña o Trofeo Cidade de Pontevedra ante o Carmelitas de Ourense
Por Almu Dapena & Cristina Saiz
Tras as vacacións de Nadal, o Club Baloncesto Arxil volveu á cancha do CGTD para disputar, este sábado, as 'vodas de prata' do Trofeo Cidade de Pontevedra. O seu rival foi o Carmelitas de Ourense, equipo de Primeira Nacional, que nada puido facer fronte ás de Liga 2, moi superiores durante todo o encontro.
O partido comezou coas de Mayte Méndez moi metidas no partido realizando unha defensa impenetrable que deixaba practicamente sen opcións ás de Ourense. Aos dous minutos de partido, o adestrador visitante xa pedía tempo morto ante a pouca efectividade das súas. Ás verdes saíanlles as cousas e endosaban un parcial de 22-2 co que se chegaba ao final do primeiro cuarto.
Empezaba o segundo e Rosendal inaugurábao cun tiro desde a liña de tres, que automaticamente era respondido con dous triplos por parte das de branco, que realizaban o seu mellor cuarto cun parcial de 13-10. para chegar ao descanso cun resultado de 35-12.
Despois do intermedio, o Arxil regresaba á cancha para sentenciar. Lideradas por unhas maxistrales María Lago (17 puntos) e Forster (máxima anotadora do partido con 18 puntos), que practicamente facían o que querían tanto en defensa como en ataque, as de Pontevedra tan só cedían 6 puntos ao Carmelitas, chegando ao final do terceiro cuarto cun contundente 61-18.
Xa nos últimos 10 minutos, as de Mayte Méndez baixaron a intensidade, oportunidade que aproveitaron as de Ourense para reducir a diferenza no marcador que finalmente quedou pechado nun 75-32.
A próxima semana, o Arxil desprazarase a Madrid para disputar o último partido da primeira volta no que se enfrontará ao Leganés.
Relacionadas:
-
O Arxil encara a segunda volta de liga coa necesidade de sumar vitorias
Por Redacción |
-
O Arxil ficha a ala-pívot arxentina Johanna Puchetti
Por Redacción |
-
O Leganés deixa sen opcións o Arxil no terceiro cuarto (71-43)
Por Redacción |
-
O Arxil valora a chegada de reforzos para o equipo de Liga Feminina 2
Por Redacción |
-
O Cortegada leva o derbi fronte o Arxil (69-77)
Por Redacción |
-
Dura derrota do Arxil na súa visita ao Real Canoe (76-61)
Por Almu Dapena |